विशाखापट्टणम येथे INS सिंधुकीर्ति पाणबुडीला दिलेल्या भेटीचा अनुभव. पेरिस्कोप, सोनार, टॉर्पेडो आणि भारतीय नौदलाच्या अदृश्य योद्ध्यांची ओळख.

ब्लॉग: INS Kavaratti आणि INS Sindhukirti – भाग १

आम्ही कामानिमित्त विशाखापट्टणमला भेट दिली. विशाखापट्टणम इथे माझा मामे भाऊ भारतीय नौसेनेत वरिष्ठ पदावर कार्यरत आहे. त्यामुळे तिथे नौदलातील मध्यम आकाराची कॉर्व्हेट (Corvette) आणि डिझेल-इलेक्ट्रिक पाणबुडी बघण्याचा सुवर्ण कांचन योग आला. कॉर्व्हेटला मराठीत “जलद आक्रमक युद्धनौका” सुद्धा म्हणतात. कॉर्व्हेट म्हणजे समुद्रात जलद गतीने गस्त घालणारी, शत्रूच्या पाणबुड्या व जहाजांवर हल्ला करू शकणारी लहान पण शक्तिशाली युद्धनौका. कॉर्व्हेट जहाजांची वैशिष्ट्ये म्हणजे या आकाराने फ्रिगेट आणि डेस्ट्रॉयरपेक्षा लहान असतात. वेग जास्त आणि हालचाल चपळ असते. कॉर्व्हेट चा वापर किनारपट्टी सुरक्षा, पाणबुडीविरोधी युद्ध (ASW), हवाई संरक्षण आणि गस्तीसाठी होतो.

आम्ही क्षितिज enclave च्या FOSM(Flag Officer of submarine) बंगलो मध्ये बसून नाष्टा करतोय. फ्लॅग हाऊसेस हे नयनरम्य अशा डॉल्फिन हिल वर वसलेली आहेत. समोर अथांग समुद्र, मागे फळबागा साठी जागा, दोन मजली टुमदार बंगला, समोर बागेसाठी जागा, बागेत बसण्यासाठी प्रशस्त व्हरांडा, दोन स्टडी रूम, ५ बेडरूम, १ किचन असा भव्य बंगला आहे. इथे फ्लॅग हाऊस साठी वेगळा प्रोटोकॉल पाळला जातो. फ्लॅग ऑफिसर शहरात असेल तर घरावर नेव्ही चा फ्लॅग फडकत असतो. फ्लॅग ऑफिसर जर बाहेर गावी असेल तर नेव्ही फ्लॅग काढून ठेवतात.